طفل صدمني الله يصلحه قبل شوي

107 23

لايمكنك التصويت حتى الحصول على 20 نقطة على الأقل
إضغط هنا للإخفاء

ابو يزيد 000 8714
قبل 10 سنه و 9 شهر

السلام عليكم ورحمة الله وبركاته

جمعه مباركه على الجميع 

ندخل بالموضوع

قبل شوي وانا رايح اجيب عدس وفول 

وقفت عند المحل وطلبت واخذت طلبي وطلعت 

وركبت السياره و ادق رويس و اطلع من الموقف و امشي قدام متجهه عند الاشاره

المهم كانت الاشاره شغاله خضراء لي ومشيت 

الا واشوف كامري قاطع الاشاره اليمين وصدمني على الرفرف الايمن :(

بس ابشركم خفايف الحمد لله

نزلت من السياره الا والكامري دق الرويس وبيشرد 

ورحت قلت له وقف وقف بيديني !!

ووقف ونزل طفل عمره ما يتعدا 13 سنه و ينتفض المسكين 

و يتعتع في الكلام وما يدري وش يقول 

قلت له : سار لك شيء حبيبي ؟ تعورت ؟

قال لا ما فيني شيء الحمد لله

قلت طيب الله يصلحك ليه تقطع الاشاره 

قال والله احسب ان الشارع فاضي 

وتكفى انا معي رخصه ولا شيء وابوي متوفي من سنه وانا سرت اخذ السياره و اطلع اجيب اغراض لامي واختي وارجع

فتكفى لا تنادي الشرطه والله انا ما دريت وابوي قبل لا يموت قالي انت رجال البيت 

فتكفى اذا مسكتني الشرطه ما فيه احد بيجيب لامي واختي الاغراض وانا رجال البيت بعد ابوي :(

والله كسر خاطري و انا امس كنت بالمقبره ندفن قريبنا الله يرحمه و يدخله جنات النعيم ( اللهم امين ) و صراحه امس تأثرت كثير يوم شفت المقابر و شفت قريبي يوم يدخلوه بالقبر حتى ما قدرت اتحمل ومشيت للسياره 

و هذا زاد الطين بله و صراحه ثأثرت من هالموقف لانه ذكرني بقريبي , والحين عياله بدون اب , مين اللي بيصرف عليهم , مين اللي بيقضي لهم , مين اللي بيسجلهم في اي جهه حكوميه او مدارس , مين ومين ومين ومين , قسم بالله الاب هو والام لا راحوا الدنيا ما عاد تستاهل العيش فيها , والاعظم راح يتقل باب من بيبان الاجر اذا مات احد الوالدين , الله يطول في عمرك يا الغالي (الوالد ) و الله يطول في عمركي يا الغاليه ( الوالده )

وعلى طول قلت له , الله يرحم ابوك حبيبي , وانتبه لنفسك و خلك رجال البيت , انت الحين رجال البيت و وخذ رقمي اذا سار لك اي شيء كلمني وانا بأساعدك ما عليك , وعطيته رقمي

وابد انا ما باكلم الشرطه ولا شيء

روح الله يحفظك لاهلك

وجاء عندي ومسك رقبتي ونزلها و سلم على راسي وقال والله ما تقصر

والله ياني متأثر منه الله يحفظه و يبقيه لعين ترجيه



الله يرحم جميع اموات المسلمين والمسلمات , اللهم انظر إليهم نظرة رضا فإن من تنظر إليه نظرة رضا لا تعذبه أبدا , اللهم اجعلهم في ظل عرشك يوم لا ظل إلا ظلك , اللهم أسكنهم فسيح الجنان واغفر لهم يا رحمن , اللهم اغفر وارحم وتجاوز عما تعلم , اللهم اعف عنهم فإنك القائل{ و يعفوا عن كثير } , اللهم إنهم جائوا ببابك وأناخو بجنابك فجد عليهم بعفوك وإكرامك وجودك وإحسانك , اللهم إن رحمتك وسعت كل شيء فارحمهم رحمة تطمئن بها نفوسهم وتقر بها عينه  

اللهم امين                          

إبلاغ

الردود